Jadi dung salpu sataon, jumpang muse tingki haboborhat ni angka raja, gabe diuluhon si Joab ma sude angka parangan jala disiaphon tano ni halak Amon; sahat ibana huhut tu huta Rabba laos ditungkum; alai tinggal di Jerusalem do anggo si Daud. Jadi dipapatu si Joab ma huta Rabba laos dipanepnep do.
2
Dung i dibuat si Daud ma tumpal ni rajanasida i sian atas uluna, ia boratna didasing satalenta sere padohot angka mata intan. Dung i dibahen ma tumpal i tu ulu ni si Daud, diboan huhut mansai godang tabantaban sian huta i.
3
Alai anggo jolma angka na di bagasan huta i diboan do tu balian jala dilobongi nasida marhite sian gargaji, angka hureta bosi pardegean dohot angka tangke. Suang songon i dibahen si Daud tu saluhut huta ni halak Amon. Dung i mulak ma si Daud dohot sandok parangan i tu Jerusalem.
4
Jadi dung salpu i tubu muse hamusuon di Gezer dompak halak Palistim. Uju i ma dibunu si Sebekkai, halak Husa i ma si Sipar, sada halak sian angka anak ni si Repaim gabe tarjepol nasida.
5
Dung i tubu muse hamusuon dompak halak Palistim, gabe dibunu si Elhanan, anak ni si Jair ma si Lakmi, anggi ni si Goliat, halak Gat, ia suhul ni hujurna, na saumban do.
6
Dung i tubu muse hamusuon di Gat; adong ma disi sada baoa na ganjang situtu, onom be jarijari ni tanganna dohot patna, gabe duapulu opat toropna; ibana pe tubu ni si Repaim do.
7
Jadi dung niinsahanna halak Israel, gabe dibunu si Jonatan, anak ni si Simea, haha ni si Daud ma ibana.
8
Luhut nasida tubu ni si Repaim do di Gat, gabe rap mate nasida dibunu si Daud dohot angka naposona i.